Video
Read full review
2016-09-04
12884 views
母親大人生日, 在下諗住帶佢同屋企人飲餐靚茶慶祝一下, 諗過去酒店中菜廳, 但覺得好似冇咩誠意, 所以決定去有 “富豪飯堂” 之美譽既福臨門, 淨係聽過名都夠晒勁, 仲要係大劉去開果間 – 灣仔店. 在下知道呢間野堅出名, 所以老早就喺2個星期前訂定枱 (事實證明在下做得啱, 因為當日見到大量客人想walk in, 都被知客婉拒).<災難級安排>訂左1點鍾, 慣例早到10分鍾, 被告之張枱未ready, 不過已經埋緊單, 要我地喺地下大堂等多陣, 雖然冇諗過黎呢啲高級中菜廳都要等位, 不過畢竟係在下早到, ok既~ 但一等就等左25分鍾, 者係成1點15分先上去… 明明訂左1點鍾…唉… 而呢25分鍾都算難過了, 要母親大人山長水遠入黎飲茶, 仲要佢等, 感到有少少安排失當同不孝…不過更難過既就係喺等候期間不停有 “熟客” 入黎, 知客直接帶佢地上餐廳, 就好似有人去到迪士尼樂園買Fast Pass, 一次過打晒百幾人尖. 在下都曾經用過Fast Pass, 所以在下理解的… 人有貴賤之分, 熟客有熟客既待遇, 只不過, 當你喺大堂門口一直無了期咁等待既時候出現一班遲黎先
<災難級安排>
訂左1點鍾, 慣例早到10分鍾, 被告之張枱未ready, 不過已經埋緊單, 要我地喺地下大堂等多陣, 雖然冇諗過黎呢啲高級中菜廳都要等位, 不過畢竟係在下早到, ok既~ 但一等就等左25分鍾, 者係成1點15分先上去… 明明訂左1點鍾…唉… 而呢25分鍾都算難過了, 要母親大人山長水遠入黎飲茶, 仲要佢等, 感到有少少安排失當同不孝…
不過更難過既就係喺等候期間不停有 “熟客” 入黎, 知客直接帶佢地上餐廳, 就好似有人去到迪士尼樂園買Fast Pass, 一次過打晒百幾人尖. 在下都曾經用過Fast Pass, 所以在下理解的… 人有貴賤之分, 熟客有熟客既待遇, 只不過, 當你喺大堂門口一直無了期咁等待既時候出現一班遲黎先上岸既熟客, 心裏就有點不是滋味.
然後等啊等, 終於叫到我地. 上到去被安排坐喺電梯口第一張枱… (好彩既叫係有個玄闗擋一擋, 未致於對正晒個電梯口), 在下稱呢個位為 “屁屁位” (斯文叫法…), 同埋好明顯呢張枱係見人多臨時搭建出黎. 等左25分鍾, 滿心期待, 最後竟然換黎呢張枱, 唉…天忙我也…
等在下講解一下呢個位如何 “屁屁” 法: 首先 後面電梯不停有食客出入, 左面收銀部信用卡機由在下坐低到離開, 都不停埋單發出吱吱聲, 屬於極度擾人級別, 而右面係廚房, 每隔一陣就有果啲匙羹倒黎倒去既嘈音, 不過都未到重點...
由於呢個位近齊餐廳門口, 廚房, 收銀, 所以有大量侍者喺呢度溝通, 通知邊個入黎, 邊張枱加餸, 邊張枱埋單, 在下呢個軍事重地都接收得一清二楚… 在下唔敢講好嘈,但以上四樣野不停輪流轟炸, 任何心情雅緻都被抹殺了.
被安排坐呢個屁屁位, 在下不能說係餐廳既錯. 位, 總要有人坐, 要怪, 就只怪時不與我, 只怪在下唔係熟客...
所謂一不離二, 坐低之後足足等左成分鍾都冇人招呼茶水, 冇人俾點心紙, 純粹乾等然後同爸爸媽媽妹妹你眼望我眼, 在下以為我地張枱變左透明. 最後好彩都有位年輕侍者察覺我地被人遺棄左, 拿拿臨開番壼茶.
喺高檔餐廳遇到咁既待遇在下還是第一次, 嗰下真係唔識俾反應, 所以喺未點野食之前已經冇晒心情, 不過點都好, 母親大人生日, 呢啲場面唯有扮冇野方為上策, 無謂搞到大家尷尷尬尬.
晏就黎呢度通常都係叫點心為主, 加埋個炒粉面飯就夠食了.
<FOOD>
餐前小食
Price: $20
好似係豆之類既野, 不過在下完全冇印像… (可能呢一刻仲係喺心情極度低落既時候, 咩記憶都冇晒)
蠔皇叉燒包
Price: $65
蠔皇叉燒包
$65
158 views
1 likes
0 comments
菜膽牛肉球
Price: $65
菜膽牛肉球
$65
114 views
0 likes
0 comments
筍尖鮮蝦餃 (推薦!)
Price: $75
筍尖鮮蝦餃
$75
113 views
1 likes
0 comments
爽滑鮮蝦腸
Price: $75
蝦腸隻蝦當然冇問題, 同蝦餃隻蝦一樣咁靚~ 腸粉皮似我地喺大埔陳漢記食開果隻, 又滑又薄. 不過母親大人似乎鍾情於厚身果啲, 話咁薄既腸粉唔似腸粉.雞粒荔芋角
Price: $65
雞粒荔芋角
$65
97 views
0 likes
0 comments
蜜汁燒鱔
Price: $220
蜜汁燒鱔
$220
137 views
1 likes
0 comments
美中不足係灘凍左之後, 底下塊皮變韌, 完全咬唔到, 呢道菜都係要趁熱食. 講起燒鱔, 不得不提大尾篤間泰國菜館忠誠茶座, 佢都有燒鱔, 勁肥勁香不特止, 仲真正做到外脆內軟, 相信所有愛鱔之人都無法抗拒.
蟹肉瑤柱蛋白炒飯 (推薦!)
Price: $300
蟹肉瑤柱蛋白炒飯
$300
171 views
0 likes
0 comments
所謂貼地…都要成300蚊, 其實都唔係好貼, 不過其他炒粉面飯都係200幾蚊起跳, 變相呢個炒飯好似抵好多, 有蟹肉wor. 收得你3舊水, 佢又真係俾足料, 蟹肉同瑤柱份量十足, 蟹肉唔係用 “一絲絲” 而係用 “一疏疏” 黎形容, 基本上每一口飯都充斥蟹香. 飯亦炒得乾身, 一啲都唔油, 同名人坊既富哥炒飯名列在下既排行榜首位.
生磨合桃露 (推薦!)
Price: $50
生磨合桃露
$50
79 views
0 likes
0 comments
蛋白生磨杏仁茶
Price: $55
妹妹則點左杏仁茶, 雖然在下無綠試食, 但聽講味道都不錯!
<DRINK>
茶水: 普洱
$20 per person
<OVERALL COMMENTS>
野食野飲COMMENTS
以點心黎講, 其實呢度既認真唔錯, 拍得住出面啲五星酒店中菜廳, 尤其蝦餃更加係難逢敵手. 而燒鱔同蟹肉炒飯更屬驚喜之作. 曾經幫襯過佢幾次午餐同一次夜晚, 所有食物都十分高質!
利申: 食物一欄評分只有33.5... 估計係因為屁屁位影響到心情, 從而影響到味蕾...
題外話: 佢地有個梅香鹹魚蒸肉餅, 索價300幾, 係在下有生以黎食過最貴既蒸肉餅, 不過同時係在下食過最好味既! 誠意推介!
服務COMMENT
之前黎果幾次, 佢地既服務都好專業同窩心. 不過唔知今日係唔係太多客人既關係, 桃花依舊, 人 “臉” 全非, 當日既細心服務同親切笑容在下已經見唔到… 或者都有既, 不過限左量, 悉數留俾 “富豪”, “名人”, “熟客”.
環境COMMENT
撇除屁屁位, 真心講, 呢度既用餐環境的確好唔錯, 裝修靚, 枱櫈坐得舒服, 枱同枱之間又闊落, 基本上就算坐到滿晒都唔會覺得嘈. 冇野衰, 就衰在下張枱真係差到冇朋友.
題外話… 又係在下瀨野… 有一張大枱, 佢地有幾個細路, 臨走時啲細路唔知點解咁興奮, 一邊尖叫一邊你追我逐, 而咁啱我地張枱喺正門口, 俾佢地以環迴立體高頻圍攻, 在下真心瞬間崩潰… 而啲細路又唔覺意踢到在下張櫈… 唉…
抵唔抵食?
叫得做富豪飯堂, 當然預左唔會平. 若只論食物質素同埋整體既環境服務, 在下覺得還可以, 價位其實同出面啲中菜廳例如龍景軒, 文華廳差唔多. 不過如果以在下呢餐飯黎講… sorry, 我真係寧願冇黎過, 今餐飯撤底破壞晒在下對福臨門既美好回憶…
餐飯雖被評為S級 (大海級), 不過呢個S主要係針對成個Dining Experience, 並非話佢野食唔好食, 服務唔好, 或者地方污糟邋遢, 即管當在下果日烏雲蓋頂, 咁災難性既用餐體驗都俾我們這一家遇到.
富豪飯堂, 人地畫公仔都已經畫晒出腸, 專門招待富豪, 在下呢種平民百姓走錯了地方, 連門面都未睇清楚就貿然走左入去, 變相自取其辱… 諗住媽媽生日, 帶佢食好啲, 唉~ spoil左成件事, 錢就俾左, 換黎既就只有失望, 真係賠了夫人又折兵.
人貴自知, “富豪” 兩字跟在下仲有一段光年級既距離, 怕且餘生都唔會有福氣感受到 “熟客” 既待遇, 故此今日一別, 亦是緣滅.
Post
