Be Leaf (Closed)

今日約朋友去觀塘聚下，網上搵到呢間餐廳，比佢多個打卡位吸引住，相信好岩我朋友。呢到裝修以波希米亞風為主，好舒服又好靚。先係花花吊椅打卡，真係點影都咁靚，之後就坐低睇餐牌。我哋叫左兩個套餐，分別係越式香茅芫茜炸雞漢堡配炸薯條同埋香辣白酒牛油炒手拆蟹肉珍珠柱貝意大利麵。擺碟用心，炸雞用左香茅芫荽，特別香脆，炸雞肉又juicy, 切落去好多肉汁，漢堡又厚又鬆軟，配搭蕃茄同生菜平衡番個口感，食落又清新。至於個手拆蟹肉珍珠柱貝配意大利麵煮得啱啱好，意粉唔會太淋，柱貝有啲QQ咬口，蟹肉絲份量又多，成個意粉都好好味，豐富口感，白酒牛油食起嚟比忌廉汁同茄汁無咁膩。自家製焦糖餅咖啡預期之外嘅好飲，飲落特別香滑，焦糖餅慢慢溶化，口感特別豐富，值得一試，好好味！Grapefruit summer soda 呢杯飲品單單貌相已經夠吸引，顔色好靚，感覺好夏天，飲落有汽同香甜，夠晒清新開胃！