利寶閣 (Closed)

今日做個乖孩子約媽媽出去飲茶，當然要揀地點方便，食物質素好嘅地方，搜尋下呢到做緊$148/位嘅午市放題（茶水加一另計），約定媽媽去嘆下先。星期日係上環區估唔到都咁多人嚟飲茶，但好在酒樓夠大，位又多，好快就安排到入座。放題任食2小時，款式大概超過50款即叫即做點心、小食、粉麵飯及甜品任點任食，另外每位更送原隻鮑魚酥及一份花膠灌湯餃，非常足料。點心選擇與平時飲茶無異，而且仲有好多特式嘅點心及小食提供。以下係個人推介——————豬腳薑，味道甜甜唔會酸，豬腳好入味，蛋亦唔硬，真係好味又養顏；懷舊芝麻卷因好少地方仲有得食，可以懷緬一下，食落好香芝麻味，而且唔太甜；蘿蔔金錢肚金錢肚炆得入味而且軟腍；仲有必食嘅晶瑩鮮蝦餃及百花燒賣王，完全大滿足。呢到放題點餐形式不錯，可依照件數或位數去點餐，大大提高珍惜食物不浪費嘅情況。唯一需要改善之處可以話係上菜速度，可能即叫即做嘅關係，所以會比較慢，但始終係限時，所以如果能夠有些少改善會好些少，不過整體而言是一個不錯而且物有所值嘅選擇。