麺屋武蔵虎洞 (青衣城) (Closed)

收工陪媽媽去青衣城行街食飯，行到差唔多，去過青衣城嘅朋友仔都知道少餐廳，所以我地都係是旦入一間，依間係未食過，媽咪話想食麵就當選。我地揀左虎尾拉麵同黑虎拉麵，仲有慢煮雞肉沙律同明太子玉子燒。日式拉麵湯底都比較濃味，虎尾係豬骨湯底而黑虎係黑蒜油豬骨湯底，湯底濃得黎唔會好咸，黑蒜油夠香，麵嘅口感都彈牙，虎尾拉麵除左有豚角姐係五花腩，仲有一條腸係豚肉腸，餡料有多種香料，咬落幾香，五花腩同叉燒都好鬆軟，唔會黐牙。沙律都唔錯，雞肉嫩滑，醬汁同胡麻醬好似，酸酸地帶點麻香，好開胃。玉子係我去日本餐廳必點，好鐘香甜嘅味道同鬆軟嘅口感，加埋明太子嘅鮮味，又係另一種味道嘅享受。食到甘上下想飲返杯野，有菠蘿特飲同雜果特飲，飲落幾清新，可以去下油膩感。味道都唔錯，好驚食到好咸嘅拉麵，但依間唔怕，係香濃嘅，食完都唔會口渴。