燧記廚房 (荔安大廈) (Closed)

天氣好，偽文青到處走走。聽啲大學生講水街有間機械人廚房嘅餐廳，專程去試吓。門面簡潔，有幾級樓梯，有別於一般小炒餐廳。點好菜，有個窗口仔可以望到機械廚房嘅操作，原來由執材料開始，已經係機械人代勞，感覺好衛生整潔。無你想像咁辣黑椒牛柳 - 見到佢細細隻字寫住冇你想像中咁辣先叫黎試吓。少少辣，牛柳好腍，正。酸酸甜甜宮保雞丁 - 酸酸甜甜，花生好脆，雞丁唔似好似其他餐廳咁黐住一大塊雞皮，而係成舊雞肉，唔錯。超下飯外婆菜四季豆炒肉碎 - 呢個超贊，形容得冇錯，超下飯。肉碎同其他配料炒得好均勻，唔通呢個都係機械廚房嘅好處？真係好惹味，值得推介。晚市送湯同飯，唔係平時茶餐廳飲嘅例湯，係好有住家風味嘅蕃茄湯。驚喜之處係估唔到機械可以炒出酒樓鑊氣又不失住家風味，係一個好好嘅體驗。