肉浦團火鍋放題

Open Now

Now Closed

今日跟朋友嚟旺角打邊爐，跟佢介紹嚟到呢間肉浦團火鍋放題，最正嘅係可以無限時放題，食飽唞吓再食過，果然冇介紹錯！我哋嗌咗個set B ，麻辣同埋清酒鴛鴦湯底，湯底非常香濃，麻辣湯底麻中帶香，有啲辣椒碎，但唔會好辣，比起出邊其他火鍋店呢度嘅麻辣湯底非常之入味，食牛肉幾乎唔需要調味料都已經好好味，好推薦大家調味料嗰度可以落多啲花椒油，佢可以將麻辣嘅香味帶上另一個層次！清酒湯底好特別，清酒係有個樽裝住另上嘅，如果覺得清酒味太濃嘅可以自己調整落幾多！Set B 嘅牛肉全部都好吸引，其中我最推薦嘅係牛背峰同埋牛滑，細細塊嘅牛肉唔會好飽肚可以有多啲空間試多啲其他肉，同時牛味亦都非常出，放落火鍋淥5至10秒就啱啱好，牛肉非常之嫩滑，入口即溶！牛滑就要錄耐多少少，牛滑幾好咬口，同樣都係食得出好香濃嘅牛味，我哋都encore咗三round！各種丸類、蔬菜、飲品任飲一定有啦，唔使多講，最估佢唔到嘅竟然係仲有熟食，可以當係前菜，想食乜都有！最特別嘅係呢度竟然仲有黑啤提供，真係估佢唔到，我哋都忍唔住整返一罐！整體嚟講都係一間質素好高嘅火鍋放題，呢個價錢亦都咁高質嘅放題，非常抵食！