Video
Read full review
2021-04-18
1625 views
焦糖燉蛋大家食得多，但有無諗過可以同泡芙一齊食?今次介紹既係由2016年開業至今，由2017到2021年都得到米芝蓮推介既小食甜品Owl's Choux。呢間Owl's Choux主打意大利泡芙，開業第一年曾經面臨瀕結業，之後得到業主肯減租，再加上初次得到米芝蓮推介，令到餐廳重新上軌道。泡芙都係每日即叫即整，每日限量最多200個，餐廳自設自家工場炮製，分別有唔同口味嘅法式奶油手工泡芙同埋意大利手工雪糕，泡芙嘅餡料唔用忌廉，而係用100%澳洲牛仔製成嘅意大利雪糕，而係雪糕入邊都會加各種唔同口味既醬料。店舖位置比較隱蔽，係k11既轉角位，唔熟尖沙咀既會好小去到個個位，我會知因為個度附近有間好鍾意既拉麵，店舖唔大，兩個向街既bar枱位、兩個向牆位同一張三個位既小圓枱，同店名一致既係會見到店內有好多貓頭鷹既擺設。第一次入去幫襯嗰時問店員有咩推介(其實係老細)，老細有好詳盡介紹唔同口味同比較推介嘅口味，而且同我講幫襯超過$58就會有一個印花，可以加落wallet入面，可以幾張單夾埋一齊計，儲夠四個印花就會有一個招牌焦糖燉蛋泡芺，喺下次買一樣嘢嗰時就會一齊送。不過可能我同老細傾偈傾得多，之後幾次佢
焦糖燉蛋大家食得多，但有無諗過可以同泡芙一齊食?
今次介紹既係由2016年開業至今，由2017到2021年都得到米芝蓮推介既小食甜品Owl's Choux。
呢間Owl's Choux主打意大利泡芙，開業第一年曾經面臨瀕結業，之後得到業主肯減租，再加上初次得到米芝蓮推介，令到餐廳重新上軌道。泡芙都係每日即叫即整，每日限量最多200個，餐廳自設自家工場炮製，分別有唔同口味嘅法式奶油手工泡芙同埋意大利手工雪糕，泡芙嘅餡料唔用忌廉，而係用100%澳洲牛仔製成嘅意大利雪糕，而係雪糕入邊都會加各種唔同口味既醬料。
店舖位置比較隱蔽，係k11既轉角位，唔熟尖沙咀既會好小去到個個位，我會知因為個度附近有間好鍾意既拉麵，店舖唔大，兩個向街既bar枱位、兩個向牆位同一張三個位既小圓枱，同店名一致既係會見到店內有好多貓頭鷹既擺設。
第一次入去幫襯嗰時問店員有咩推介(其實係老細)，老細有好詳盡介紹唔同口味同比較推介嘅口味，而且同我講幫襯超過$58就會有一個印花，可以加落wallet入面，可以幾張單夾埋一齊計，儲夠四個印花就會有一個招牌焦糖燉蛋泡芺，喺下次買一樣嘢嗰時就會一齊送。不過可能我同老細傾偈傾得多，之後幾次佢都認得我，有次我淨係買咗$104佢都俾咗兩個印花我。
除咗忌廉泡芙同埋意大利雪糕泡芙，另外仲有迷你小泡芙，不過入邊就冇cream，但會有一啲鹽粒糖粒係上面，配上海鹽焦糖醬。
而意大利雪糕唔一定要連泡芙，都可以單獨咁嗌，可以嗌單球、雙球、三球，甚至可以加法式小泡芙喺雪糕上面。意大利雪糕嘅口味我第一次去有六款，榛子、北海道牛乳、伯爵、藍苺乳酪、焙茶同埋芒果雪葩，但之後再去焙茶同埋芒果雪葩無左，反而多咗椰子斑斕雪糕。
飲品方面分兩大類，除咗有咖啡仲有鮮奶，咖啡有經典嘅美式咖啡、拿鐵、意大利泡沫咖啡等。而鮮奶就比較特別啲，有紫薯鮮奶、香蕉朱古力鮮奶等。只要有叫泡芙都可以跟餐價平一啲品嚐到。
食完第一次覺得好好食，第二次幫襯時想買外賣俾女朋友，就邊坐邊食，臨走時先買外賣，問老細佢話即日食嘅話唔使雪都得。
因為今次我唔係食完就走，坐咗一陣，發覺只要係堂食，老細都會斟茶俾你，或者話你知有得斟茶飲，飲完之後覺得幾香幾好飲而且可以解膩。之後佢好推介依種茶，唔係淨係推介比我，同其他枱既客都有講，話飲左呢個茶個人會慢啲，因為個麥香味好重好鍾意就問邊度有得買，佢話monomono有得買，呢種獨特既茶味仲未係其他茶葉搵到。
之後應該係第三次去店舖，店主已經認得我係咪問過佢茶葉喺邊度買，當我去斟茶試佢話換咗茶葉已經，今次換咗南非嘅國寶茶，話今次唔係出邊買，而係人哋俾佢，飲落又係好順口，佢話飲呢個茶好，好似可以降血壓、降三高，有時店主自己一個人做嘢做到頭暈，一飲完又精神返，聽完之後都飲咗幾杯。佢話其實每日沖完都剩咗好多茶，最後都自己飲晒佢，可能因為咁每次見到客人佢都好推薦大家斟多啲茶飲。
喺度飲茶嗰時聽到佢同客人嘅對話，佢同客人講招牌焦糖泡芙已經冇晒，客人話點解咁快無哂，佢話今日係last day，我聽完之後嚇一嚇，咁好食有咁好生意嘅舖頭咁快要執？之後佢講笑話係呢個星期既last day，因為餐廳每逢星期一休息。會想快啲清晒啲貨所以賣晒就冇，之後我再問佢賣晒嘅款係咪唔會再做，佢話原來差唔多收舖，因為嗰日阿媽自己一個喺屋企，所以想快啲收鋪返去。
已經食咗幾次既我好奇一問店主，點解叫貓頭鷹泡芙，店主話係去完九洲旅行之後改咗呢個名，呢個名已經改咗好耐，因為九州有好多貓頭鷹，本身改呢個名嗰時冇諗咁多，但之後發覺呢個名好適合，因為貓頭鷹有啲象徵幸運，而且貓頭鷹唔會成日都見到，改完之後發覺其實貓頭鷹好代表到佢同依間鋪，一直都係好幸運。而且貓頭鷹嘅英文係Owls，O佢覺得係代表泡芙，而wl 係解with love，改完之後嘅幾年發覺呢個名真係好適合而且好有意義。
-
1️⃣ Creme brûlée PUFF 💰36（👅: 9.5/10）
Creme brûlée PUFF
$36
24 views
1 likes
0 comments
呢個係店鋪既招牌，焦糖燉蛋泡芙。泡芙都係即叫即整，感覺上呢個招牌嘅口味嘅時間耐啲，因為佢會用火槍燒下上面嘅焦糖，大概需要等10至15分鐘。
泡芙大小比平時食既會細啲，上面有焦糖脆脆，泡芙嘅內餡充滿吉士忌廉，係焦糖同雲尼拿口味，所以會清楚見到啡色同埋白色嘅忌廉同見到雲尼拿籽，老細會介紹食法，唔好淨係食上面焦糖，或者淨係食泡芺，要連埋兩個一齊食最好。
焦糖燉蛋非常出色，咬落上面勁脆，脆既程度係咬落會有聲，有小小厚度唔會一咬就無哂，脆而不硬，味道唔會過甜，而且燒得岩岩好唔會苦，係食過最好食既焦糖燉蛋。法式泡芺外表上會見到有紋狀，食落夠鬆軟，對比起一般扁身平滑食落係煙韌既泡芺，一咬滿滿既內餡爆哂出黎，唔會話內餡邊個位會唔夠，食落香滑，雲呢拿味好香，上面脆脆連奶油同泡芙一齊食，無論味道定係口感都係有層次感，而且佢係CREAM所以比起真既，cream brûlée口感仲要再豐富。可能因為佢唔大個，所以食完完全唔覺得膩。
-
2️⃣⃣ Paris - Breat 💰38（👅: 8/10）
Paris - Breat
$38
15 views
1 likes
0 comments
呢個係榛子泡芙，內餡係飽滿既樁子奶油，而上面係一粒粒既海鹽脆粒，再食食到鬆脆既泡芙，樁子奶油味道夠重，對於樁子愛好者係滿口滿足感，加上脆脆海鹽脆粒，有CREAMY同時有咬口既口感，實在係一口接一口。
外脆內軟既原味泡芙，包裹住特濃榛子Gelato，面頭仲有啲可可球同朱古力蛋糕，一啖咬落去榛子醬係口中噴發，真係超好味。鍾意食繽紛樂既你，一定會鍾意～
-
3️⃣⃣ Praline Noir 💰60（👅: 8.5/10）
Praline Noir
$60
50 views
1 likes
0 comments
係一個榛子做主角，加意大利雪糕既手工泡芙，外表似係外餡豐富既菠蘿包，老細教食呢個要一啖雪糕一啖Puff咁樣食，唔好淨係食一邊。雪糕上面既係朱古力脆脆，食到底會有樁子同朱古力BROWIES。泡芙係原味，榛子果仁糖雪糕加一口鬆脆既泡芙，口感上非常搭，雪糕食落夠柔滑夠奶香，唔會好快融，加上味道夠濃既花生醬同榛子糖漿，配搭口感脆脆既脆球，同朱古力既味道相映成趣，雪糕加脆脆好似食緊牛奶加脆脆既早餐咁，食到底就會見到BROWIES，夠鬆脆，加埋雪糕同泡芙又係另一種享受。
-
4️⃣ Red Velvet 💰60（👅: 8.5/10）
Red Velvet
$60
44 views
1 likes
0 comments
呢個係我試嘅第二個意大利雪糕手工泡芙，呢個口味都算係最人氣嘅其中一個，可能因為佢酒紅色嘅外表，雪糕當日得四隻口味，榛子、北海道牛乳、伯爵、藍苺乳酪，我揀咗伯爵茶。
因為我有食過佢新口味嘅泡芙叫toffee lady，泡芙上面嘅cream都係主要係伯爵茶嘅味道，而呢個伯爵茶雪糕食落個味道會比嗰個cream甜一啲，因為佢係純伯爵茶，而呢一個cream係溝咗花同其他成份，雖然甜一啲但係都唔會話覺得Heavy覺得太甜，甜得黎都係帶有茶香味。
雪糕上面我有啲紅絲絨嘅粒，食落好有口感，天鵝絨粒食落唔甜，不過紅絲絨嘅味道相對淡啲，反而士多啤梨嘅味道比較出，因為雪糕底部有一啲士多啤梨同玫瑰嘅醬，醬唔會太多所以唔會太過搶味道，但食落唔係得個甜字，而係甜中帶少少咸，因為會食到加咗鹽粒，食落感覺會去走咗部份嘅膩感。
當雪糕食咗一半之後，可以好似漢堡包咁食成個泡芙，滿足感爆棚，因為多重嘅味道同多重嘅口感享受，唔止係雪糕上面，泡芙上面都係有紅絲絨粒，不過就唔係一大粒，而係類似red velvet cake，食落係鬆軟得來帶少少濕潤。
泡芙因為都係新鮮焗起，食落係熱熱地，同雪糕形成冰火嘅對比，而且泡芙入邊有粟米脆化，口感再多一個層次。
-
5️⃣ Tiramisu PUFF 💰36（👅: 9/10）
Tiramisu PUFF
$36
19 views
1 likes
0 comments
呢個係特別既泡芙，老細話MENU未有圖，因為本身想試焦糖既泡芙點知賣哂，佢就推介我食呢個，之後我再去幫襯問咗次都有，算係喺隱藏Menu入邊。食法係要將上面既蛋黃醬連同內餡既咖啡醬一齊食，先會有Tiramisu既感覺。果真當兩者二合為一，就係神奇既Tiramisu味奶油，加上鬆脆既泡芙又係一個新味覺衝擊，感覺呢個鬆脆既法式泡芙，加上任何味既奶油都係好食，加上呢個Tiramisu奶油做得出色。
-
6️⃣ Toffee Lady 💰44（👅: 9/10）
依個係三、四月新出嘅其中一個口味，另一個新出嘅口味係越南咖啡。
呢個係店主原創嘅泡芙，因為店主鍾意食chocolate bar，所以將佢嘅概念擺落泡芙入邊，但平時食到既chocolate bar都係比較甜，呢個係經過改良，泡芙上面嘅係朱古力，朱古力上面嘅cream，買嗰時店主介紹係伯爵茶，食緊個時再問，佢話其實係有好多種茶炒成，除咗伯爵茶仲有花、拖肥等等。
泡芙入邊呢舊係雲尼拿cream，食落去上面嘅朱古力味道唔會苦澀，亦都唔會過甜，同時又食到入邊軟滑嘅雲尼拿cream，而上面嘅伯爵茶cream聞落好香，食落除咗有伯爵茶茶香味，仲有配合得好好嘅拖肥味，兩者結合得好好一啲都冇違和，雖然呢個泡芙有好多仲味道擺埋一齊，但一齊食冇話邊個互搶做主角，全部都平衡得好好，個人好鍾意上面嗰個cream，唔甜但有好香既茶味，題外話依個係店主最鍾意嘅泡芙，因為係佢原創嘅泡芙，比起招牌嘅焦糖燉蛋泡芙佢更加鍾意呢個。
-
🌟可以話係食過最好食既焦糖燉蛋，同時係最好食泡芙，兩者結合得好好，加入唔同奶油重現唔同既味道，店舖位置方便係尖沙咀，有時間我就會去食個Creme brûlée PUFF 坐下飲下茶放慢個人。泡芺口味仲有雲尼拿、焦糖，雪糕泡芙仲有Popcorn & Rocks、Mango Tango同Red Velvet，要試哂睇黎要去幾次，係尖沙咀絕對係高質既甜品，無論係飯後一小個泡芺所結，定係外賣返去定買比人食，我已經介紹過無數人去依間店舖試，試完佢哋都話好食，而且自己再返去買。
試過其他口味，始終覺得招牌既焦糖燉蛋最好食，因為兩者結合實在太完美，但其實呢個焦糖燉蛋泡芙並唔係店主最鍾意嘅口味，啱啱新推出嘅Toffee Lady 先係店主最鍾意嘅一樣，因為佢覺得依個伯爵茶、拖肥、朱古力bar泡芙所有嘢都係平衡得好好，而且係原創嘅泡芙。而焦糖燉蛋並唔係佢原創，佢只不過將呢樣嘢擺落泡芙入邊，只不過冇人諗過將焦糖燉蛋擺落泡芙一齊，但我覺得依兩個口味都係最好食嘅兩個口味，我諗試過晒所有口味之後，cream puff我應該會keep住淨係食呢兩個口味，至於意大利雪糕嘅泡芙我推薦red velvet，甜得來又未至於過甜，味道又好特別好清新，唔係平時食到嘅口味。
特別一提係official收鋪時間係寫2130/2200/2230/2330，因為我有試過食白果所以問，老細話收鋪唔定，賣哂就會提早收，通常8-9點就會收鋪，8點可能唔再整賣哂就收鋪所以，如果想食到唔好真係9點10點先去到，如果驚賣晒可以試吓7點嗰時落單買，可能8點幾嗰時返去攞都得，如果食完晚餐先去買就可能已經賣晒。
另外因為店舖星期一休息，所以星期日好大機會賣晒嘅泡芙就唔會再做，如果星期日想去試就要早啲，尤其係啲vanilla cream based既泡芙，好似招牌焦糖燉蛋泡芙、原味雲呢拿泡芙。
-
👅味道: 9/10
🍴環境: 7.5/10
💰消費: $36-60 (服務費: NA)
Post
