焰拉麵 (Closed)

係元朗多左好多間日本餐廳，行經元朗教育路已經有好幾間，選擇都幾多。呢間焔ラーメン(焰拉麵)裝修成日式風格，主打博多豬骨拉麵及東京醬油拉麵。種類選擇都算多，正當我唔知點選嘅時候，職員就向我推介「鮮焔」。呢碗拉麵係魚介豚骨(海鮮豬骨)，內裏有好多橙色細細隻嘅櫻花蝦，碗麵就變到好似有一點點火焰咁，賣相都幾靚喎。叉燒肉質鬆軟，仲保留左些少肉汁，再加埋海鮮豬骨湯味道更加唔錯。食鮮焰會另附一支魚介酢(海鮮醋)，好有趣嘅係內裏浸住幾條魚仔，酸酸地加少少落去，湯嘅鮮味會更好。拉麵硬度適中，好有口感，另外追加替玉，替玉的意思原來係「加麵」，因拉麵幼細，好易被湯浸淋，一開始不會放晒所有麵，食到一半的時候就可以黎個替玉，若覺得唔夠食，加多15蚊就可以有多一底麵。再叫多個小食，板燒烏賊鬚嘅醬汁唔錯，烏賊鬚不會過韌，兩者配搭得很好。