Video
Read full review
2021-09-01
75 views
🍴薑蔥爆豬膶 HK$79厚切豬膶爽脆鬆軟，無異味，準備功夫做得足，加埋薑蔥爆炒，唔會熟得滯變緊實，非常香口。🍴馬拉盞通菜牛肉 HK$88蝦醬或腐乳炒通菜都好食，但我更鍾意馬拉盞，貪佢鹹香更有層次。幼身通菜翠綠無變黑，鑊氣夠先炒到呢種顏色，食落脆嫩，牛肉腍滑得嚟唔會醃到無晒肉味，菜同肉分量十足，送到幾碗飯。🍴淮香炸子雞（半隻） HK$108炸子雞係我每次飲宴最期待嘅菜式，但經常令我失望，有時太油、太乾，有時又只分到雞胸，而呢碟炸子雞絕對滿足到我，皮脆肉嫩，雞胸唔鞋，碟底亦無多餘油分。🍴黃金蝦球 HK$98薄薄一層脆粉包住蝦球炸至香脆，肉質爽彈，再披上泡沫狀嘅鹹蛋黃醬，香而不膩，唔會過鹹，剛剛好。🍴椒鹽鮮魷 HK$88鮮魷唔韌亦唔會過腍，外層係類似英式炸魚嘅脆皮，特別香脆，再加上大量炸蒜，同埋相信係炸米粉嘅碎粒，辣辣地味道有啲似熱浪，極之惹味。🍴潮式煎蠔餅 HK$88表面非常鬆脆，一夾落去先知餅底係另一種質感，有少少似薄罉，煙煙韌韌，幾飽肚，蠔仔亦唔少，鮮甜無沙。餐廳標榜無味精，只用日本食鹽，道道菜式都夠晒味，食完唔算口渴。幾款唔同炸法嘅菜式都好出色，盡顯廚師功架，有機會想試埋煲仔菜。除咗
🍴薑蔥爆豬膶 HK$79
厚切豬膶爽脆鬆軟，無異味，準備功夫做得足，加埋薑蔥爆炒，唔會熟得滯變緊實，非常香口。
🍴馬拉盞通菜牛肉 HK$88
蝦醬或腐乳炒通菜都好食，但我更鍾意馬拉盞，貪佢鹹香更有層次。幼身通菜翠綠無變黑，鑊氣夠先炒到呢種顏色，食落脆嫩，牛肉腍滑得嚟唔會醃到無晒肉味，菜同肉分量十足，送到幾碗飯。
🍴淮香炸子雞（半隻） HK$108
炸子雞係我每次飲宴最期待嘅菜式，但經常令我失望，有時太油、太乾，有時又只分到雞胸，而呢碟炸子雞絕對滿足到我，皮脆肉嫩，雞胸唔鞋，碟底亦無多餘油分。
🍴黃金蝦球 HK$98
薄薄一層脆粉包住蝦球炸至香脆，肉質爽彈，再披上泡沫狀嘅鹹蛋黃醬，香而不膩，唔會過鹹，剛剛好。
🍴椒鹽鮮魷 HK$88
鮮魷唔韌亦唔會過腍，外層係類似英式炸魚嘅脆皮，特別香脆，再加上大量炸蒜，同埋相信係炸米粉嘅碎粒，辣辣地味道有啲似熱浪，極之惹味。
🍴潮式煎蠔餅 HK$88
表面非常鬆脆，一夾落去先知餅底係另一種質感，有少少似薄罉，煙煙韌韌，幾飽肚，蠔仔亦唔少，鮮甜無沙。
餐廳標榜無味精，只用日本食鹽，道道菜式都夠晒味，食完唔算口渴。幾款唔同炸法嘅菜式都好出色，盡顯廚師功架，有機會想試埋煲仔菜。除咗小菜，餐廳仲有早餐、午餐、下午茶，呢度免費泊車，附近街坊不妨一試。
📍King's & Queen's 冰室
馬鞍山西沙公路533號泥涌村地下
Post
