真秘鍋 (Closed)

旺角呢間真秘鍋，幾乎係我同朋友聚會必去訂房打邊爐唱K嘅餐廳。秘鍋－－雞煲翅，係熟客/熟客介紹先識得預訂嘅隱藏版豪華湯底。需要提早一至兩日向餐廳order。熬足一日的雞湯金黃，超級濃郁，入口每一口都是膠質，對於對食物有要求已經食慣咗一般火鍋湯底嘅朋友，不妨試吓呢個隱藏式矜貴版秘鍋，絕對係一試難忘，唔係普通湯底可以比擬的。另一個必點湯底係招牌九五之尊，龍蝦味非常出，打邊爐用嚟搭配海鮮配料真係冇得頂！龍蝦鍋入面嘅仲有特別QQ水晶粉，吸晒湯汁，又鮮又彈牙。呢度嘅刺身亦都好出色，新鮮即撈嘅澳龍刺身、象拔蚌刺身鮮甜爽口，仲有市面少見嘅花金古魚刺身。自家丸餃手工製大粒有誠意，牛肉有本地手切鮮牛，有唔同矜貴部位，五花子帶軟骨，牛肉味濃兼且爽口。鍾意來真秘鍋，因為呢度除咗有VIP房有得唱K，仲有一個原因，係因為呢度食物質素好，同連鎖集團唔同，火鍋店食出半私房菜感覺，餐廳對食物有份執着、出品有誠意。