Cocina 3 Tapas Restaurant & Bar (Closed)

之前嚟呢度食過一次，覺得佢哋性價比高，所以今日再嚟回味一番。個餐牌好似有少少變動，睇落多咗好多唔同嘅食品選擇，俾我發現一個馬德里傳統牛肚，估唔到西班牙都有我哋香港人鍾意食嘅牛肚，烹調方式用大量香料醃製，一上枱已經聞到一陣陣香料酥香味，牛肚炆得好淋，味道濃厚但唔會好鹹，其實呢個餸白飯真係唔錯，食我哋冇嗌白飯。龍蝦海鮮忌廉湯，估唔到佢哋嘅份量10分大，我哋兩個人share，每人都有一整碗嘅湯，湯料十分多，魷魚及蝦等，龍蝦味濃及鮮甜，加咗忌廉令到個湯更加順滑。炸和牛舌配蕃茄莎莎，牛脷一向係我最鍾意嘅小食之一，和牛脷更淋及牛味更濃，加上蕃茄鋪面減少肥膩感。蘑菇火腿手打自家薄餅，基本上係一個濃厚芝士批，水準唔錯。加埋一杯啤酒，一路食一路吹水，寫意。