越港正宗越南湯粉 (Closed)

「隱世」「小店」「美食」「邪惡」「超人氣」，相信大家見到呢啲字眼第一時間都會諗起喺乜假期收咗人錢去寫嘅食評會岀現。喺寫緊呢篇食評時個標題本來係「灣仔隱世越南美食」，但之後諗多陣覺得太做作，太似打手會寫嘅標題，太似乜假期啲標題，所以最後改咗做依家你見到嘅標題。Ok，廢話講完，可以入正題。越港喺灣仔玩具街隔離，近灣仔街市嘅一條橫巷入面。當日帶咗朋友去灣仔見識一下玩具街，佢好開心咁睇咗幾個鐘，買咗兩盒模型，我唔太清楚啲模型岀面賣幾錢，不過朋友話有啲款平過佢平時喺旺角買。佢開心就得啦，睇完都已經3點幾，邊行邊揾食咩，行到近街市嘅後巷見到有間越南嘢，而且2點半之後有下午茶餐，掂，入得。坐低之後問老闆娘午餐同下午茶餐嘅生牛河有咩分別，老闆娘話下午茶平啲同細碗啲。因為都遲咗食晏，就叫碗細啲嘅河粉啦。牛肉普普通通，但係碗湯有驚喜，牛肉味比想像中濃，而且唔似係味精，食完之後唔會好頸渴。48蚊有咁飽嘅一餐，仲要係已經細碗咗，好飽好滿足。