881包子

Open Now

Now Closed

專程遠道而來呢間鋪買左一個玉米鮮肉小包（6隻）餐配小米粥，一個醬肉大包餐（2個）配豆漿，加一個豆沙包，兩個滷蛋。包既麵皮係嗰種中式傳統"老麵“ ，比較煙韌又咬口，又比較有麵粉香，呢點好唔錯，所以我中意佢地既麵皮。但弊在肉餡既油味好難聞！衰過唐x包點既肉包味。唔知點解好多大陸品牌既野都係呢種油味，聞到都想嘔。所以兩款肉包我都只係咬左一啖就唔要了。唯有個豆沙包因爲無肉陣油味就食完，ok, 我覺得個豆沙餡可以甜返少少。如果呢度有花卷或饅頭就好了，咁第日我會只買花卷或饅頭，因爲佢地既包真係得麵皮好食，肉餡唔掂。所有野最好食反而係小米粥，唔錯。豆漿非常一般，大把其他鋪頭既豆漿好飲又有豆味過佢。今次最嬲既係我去現場買，臨走仲同店員再三確認係咪齊晒，店員好肯定地話齊晒，我返到屋企先發現佢地俾少兩個滷蛋，真係激氣。當時店内就得我一個人買野，又唔係忙，就得咁幾樣野都可以執漏，個職員都唔知有無帶腦返工既！