KOI Thé (Moved) New Location

初四喺旺角食完韓國野，諗住走去卡拉OK Hea下，點知原來香港人真係冇咩野做，哈哈full晒，仲話要等幾個鐘頭先有機會有房，咁梗係唔等啦。跟手就慢慢行過去登打士街嗰邊諗住買杯野飲，認真講本身幾討厭呢條街，因為真係任何時間都好多人，要用九牛二虎之力先行得過。不過呢度都有好幾間台式飲品店，好似清玉、茶湯薈、貢茶等，我地當日就揀左 KOI Thé，係台灣50嵐喺香港開嘅品牌，主打瑪奇朵飲品，以前都有幫襯過好幾次都覺得OK。烏龍瑪奇朵 $23/中之前飲過幾次，分別係水蜜桃、榛子瑪奇朵，都覺得佢地嘅瑪奇朵的確幾香甜幼滑，今次叫咗烏龍瑪奇朵 - 少甜。本身烏龍茶幾清，配合瑪奇多嘅甜味，啱啱好。飲嘅時候喺杯蓋上𠝹開少少，不用飲管，入口既有細滑奶泡，又有淡淡清茶，解渴得黎唔會好寡，不俗，價錢亦唔貴。