森泰遠甜品餐廳 (Closed)

喺apm晚飯後行前一個站搭巴士當散吓步,一落地鐵站到觀塘工業大廈個閘口就俾個廣告吸引咗注意,係一間叫「森泰遠」既餐廳,朋友又口痕想食甜品,於是上去睇下.餐廳係工廈入面,閘口行上一層好方便唔難搵. 隨咗甜品,早午晚餐都有供應.入到去,氣氛好warm,好relax嘅感覺.一坐低就俾自助早餐嘅poster吸引咗,下次過嚟呢頭做嘢又多一個早餐選擇,想像下咁輕鬆嘅環境食嘆個早餐係幾咁舒服. 睇返menu,款式都幾豐富,最後我地就叫左兩杯飲品,芝麻湯圓同法式蛋奄列.先黎芝麻湯圓,薑水好好味,薑味同甜度配合得好好,主角湯圓更加無失望,一食就知係自家製,皮薄但唔會容易爛,芝麻餡料好香口結實起沙,口感一流,一碗湯圓已經好有驚喜. 法式蛋奄列更加係用心之作,外表係奄列,切開裡面係梳乎里,外脆內軟口感一流,味道方面,一入口好香蛋味,但唔會太甜太膩,份量都唔算小,配埋生果做裝飾,絕對係睇得又食得,朋友見到都忍唔住要打個卡呃下like. 呢度絕對係值得再黎,用心整出黎既食物食起係特別唔同,好欣賞呢份心思!!