Cafe Paradise (Closed)

之前上網見到好多人推薦依間cafe，見佢近男朋友屋企，於是就拉埋佢嚟試下。佢個menu都有幾多選擇，無論係野飲定食物。佢個menu嘅設計非常之有心思，一打開就有3D嘅立體圖案出現，好有驚喜。我地叫一個晚餐set同一個主菜share。依度嘅staff好親切同好留意到客人嘅需求，我同男朋友冇出聲，個staff主動俾隻碟仔我地分野食，服務好好。南瓜忌廉湯(跟餐）忌廉味比較重，入口好滑，我食個唔鐘意南瓜嘅人都覺得接受到，所以唔鐘意南瓜嘅人都可以試下。田園沙律(跟餐）沙律用咗胡麻醬，d菜都幾新鮮，份量唔會多都食唔落之後嘅野。卡邦尼意大利粉(套餐$123/單點$73）幾重芝士味，好creamy，煙肉嘅份量好多，但係又唔會過咸，意粉份量都算多。龍蝦湯海鮮意大利飯($78)我個人都幾鐘意龍蝦湯，見佢難得價錢唔算太貴，於是就叫咗佢。海鮮嘅份量都多，有蝦、帶子、蜆、魷魚同蟹柳，味道偏甜，飯嘅份量同樣都好多。藍莓雪糕(跟餐）好少可跟餐雪糕係藍莓味，食到有果肉，酸酸甜甜咁，幾清新。玫瑰朱古力(跟餐+$15）玫瑰味唔算好重，但係朱古力味就好重，唔係甜到膩果種，而係有少少黑朱古力味嘅感覺。