鮪世市場 (鴻威大廈) (Closed)

原本諗住出旺角行街街，但天氣實在熱到見到錢都唔識執，經過呢間鮪世市場，一開門冷氣涼浸浸，就二話不說衝咗入去。入面有吧枱亦有長枱，無論獨行俠定三五知己嚟都啱晒。叫咗兩份午市套餐，店員首先奉上前菜，包括麵豉湯、蒸蛋同沙律。沙律選用柚子醋，酸酸味味令人開胃。蒸蛋上枱嘅時候熱辣辣，蒸蛋好滑，入面材料都豐富。麵豉湯裏面有好多昆布同豆腐，湯唔會過鹹，平時我好少飲晒成碗，不過呢個我就可以。其中一份午市套餐就揀咗市場壽司盛，包括有燒三文魚卷、玉子、特大赤海蝦、帆立貝、墨魚、油甘魚同三文魚，壽司魚生用料上乘，而且夠新鮮，所以每一件都咁好食。另外仲揀咗魚生角切丼，選用嘅魚生款式豐富，有三文魚、油甘魚、八爪魚、玉子等，蟹籽份量尤其多。伴隨午市套餐可以追加三點刺身盛，包括有三文魚、帆立貝同油甘魚。三文魚屬於厚切，所以口感特別豐富，每件刺身都好新鮮，真係想再encore。老公話想食吞拿魚，所以就點咗個特選本鮪壽司盛，分別有赤身、中拖羅、大拖羅同拖羅蓉，拖羅級別魚油撲鼻，真係非常甘香，呢個價錢一啲都唔貴。老公唔鍾意食鰻魚，所以冇揀鰻魚飯，唯有叫個鰻魚手卷滿足一下自己。鰻魚都好厚肉又肥美，加埋脆脆紫菜真係冇得彈。