友口馥 (Closed)

呢間腸粉舖成日都排長龍，今日經過竟然唔洗排隊，梗係立即入去試一下啦。原來入面得好少位，大家都好似逼埋逼埋咁食，但係又個個都食得好開心，呢個可能就係成日排長龍嘅原因。呢間腸粉舖主打用石磨做漿嘅腸粉，即叫即蒸，我梗係不甘示弱，叫咗個櫻花蝦腸粉同埋傳統d嘅牛肉腸比較一下，而牛肉腸我係有加蛋嘅，先講腸粉皮，真係夠幼細，好過深水埗嗰d，腸粉兩個口味我都鍾意，不過偏愛加咗蛋嘅牛肉腸多d。跟手仲試埋佢嘅菜乾豬骨粥，豬骨味香得黎唔太咸，又唔係好肥，好食，最後仲叫多個芝麻糊，都係用石磨磨嘅，好香芝麻味，感覺應該係無添加嗰種味道，值得一試。臨走要咗支有桃膠嘅支裝飲品帶走，老闆娘話都係自己煲嘅，又真係幾正woo。總結：值得推薦！