銀杏館烘焙

Open Now

Now Closed

一向都有follow開「銀杏館」呢一間主力支持長者就業嘅社企，知道佢哋平時都會聘請銀髮員工，仲會派發愛心飯盒比弱勢社群，覺得真係相當有心，所以今次見到佢哋話喺觀塘開新舖就專程去睇睇，諗住趕喺新年前買返啲曲奇酥餅用嚟送禮都唔錯🤤👍🏻。入到店內，即時有位笑容可掬嘅婆婆過嚟招待，仲介紹自己叫小燕，係個可愛又健談嘅婆婆👵🏻。佢話目前最受歡迎嘅款式係「蝴蝶酥」同「喜樂曲奇」，而依家做緊新店開張優惠，長者仲有額外折扣。場內有提供即場試食，等客人可以試啱味再買。蝴蝶酥絕對係童年回憶，金黃色澤，食落鬆化偏厚身，個人覺得如果可以再掃一層糖漿，口感就更加之好啦！試完蝴蝶酥，再試咗喜樂曲奇。小燕婆婆話呢款係老師傅自行研發嘅獨家口味，之所以改名叫喜樂曲奇係因為希望每位食呢款曲奇嘅客人都可以充滿喜樂、日日開心，實在幾有意思。呢款曲奇自帶清香，佢嘅肉桂味較濃，再有一些紫紅色的提子乾，成份當中有寫用了橙皮和檸檬皮，但相對肉桂就不是太突出。除咗兩款熱賣品之外，另外仲有蝦米酥同其他賀年食品，蝦米酥試過都幾好味，一入口已經食得出蝦米嘅鹹鮮，喜愛鹹味嘅人應該會幾鍾意。