壽司派 (Closed)

早幾日去左食午餐，當時一點左右，不過未有人等位。我一個人，唔駛等就有位。見到有十幾款便當，由五十幾到一百零幾，沙田商場食肆來講，算係豐儉由人，而選擇都多而且唔同，例如有幾款雜錦壽司便當、有泡菜雞柳便當、二色三文魚 (熟和生)飯便當、吞拿魚便當等。我點左穴子壽司雜錦便當 ($88)，除左大大件穴子壽司，壽司仲有兩件帶子卷、醬油三文魚、海螺、劍魚、蟹棒；前菜有沙律、蘿蔔木耳醬油漬、煎玉子豆腐；仲有麵豉湯。沙律：十分新鮮既生菜，好鮮甜，粟米同蕃茄都好甜，十分醒胃。蘿蔔木耳醬油漬：好入味既醬油漬，蘿蔔有三大件，木耳又夠爽，不錯。煎玉子豆腐：係冷盤，不過外層係煎過，好香。壽司：穴子壽司不得了！有入口即溶既感覺，輕輕燒過下又好香口，食到停唔到口！其他壽司水準都好高，好足料，擺放亦好整齊，真係睇得又食得，好正呀！其實食物方面係無從挑剔，惟獨服務有待改善。餐廳職員唔係無禮貌扮見你唔到，而係人手實在唔夠，帶位的同事要睇門口、又要執台、又要鋪台斟茶、仲要落埋單同負責埋單！(真係登佢辛苦) 當時都未坐滿人，但成日都見到有人叫天不應叫地不聞，要正視下問題啦。