麵館皇

Open Now

Now Closed

我嗌咗麻辣口水雞配藥膳刀削麵。又要養生，又要麻辣，感覺好矛盾，又無咁有罪惡感😁。刀削麵好煙靭，口感幾好。鍾意食煙靭麵體嘅朋友應該會喜歡，而且份量都幾足夠。湯底係淡淡嘅藥膳味。用砂鍋裝真係食到尾都熱辣辣。整體來講味道偏溫和清淡，配一啲重口味嘅餸就好適合啦。口水雞味道中上，幾好食。除咗蒜頭、辣椒粒同花生粒，仲有啲豆豉喺上面。我覺得係加分同惹味咗嘅。口水雞底下就係個汁同紅油，再墊咗層青瓜。食到咁上下可以整啖青瓜清清口，幫條脷降下溫。雞肉都唔會嚡口，不過都幾多骨下。個人覺得調味可以再鹹啲同辣啲，啲雞都可以再凍啲，咁就會更加好食。另外兩位朋友就揀咗豬軟骨同滑雞。豬軟骨其實都幾好食，不過對我來講就唔夠味去搭配較清淡嘅藥膳麵，滑雞更加係太溫和啦。🤣唔食得辣嘅可以試下，但食得辣嘅會推薦食口水雞先。👍