阿鴻小吃 (Moved) New Location

阿鴻小吃深入民心，以前係北角果陣我無機會幫襯，反而搬左去觀塘後先有機會試下。今次同柑太去晚飯，原本想食意大利野，最後都係變左食阿鴻。因為我同柑太都係細食之人，決定叫一個飯加一個餸，佢想食鵝片，於是就叫鵝片飯，而再加一個併盤，諗左好耐，就食牛展加豬腩肉加個豬耳。等上菜時，留意下四周，發覺中式風格之外，其實夾雜好多港式元素，檯面既餐紙都好用心機去介紹阿鴻小吃既來由。等左一陣，個鵝片飯就上檯，每執鵝片都切得幾厚，食落口感幾口，咬多幾次等個肉汁同鹵水汁混和後吞，濃郁既鹵水入面有甘甘甜甜既肉味，幾好。鵝肉嫩，亦幾少肥糕，鹵水汁比個飯吸左，反而食落唔覺太咸。不過層皮幾韌下，咬左兩啖就放棄吐番出黎。鹵水三併，豬耳同埋腩肉最好，牛展味道唔深，唔算好突出，豬耳食落有咬口，而腩肉幾出色，肥肉唔多，鬆軟入味。而佢個併盤底有豆腐，吸左鹵水後，唔太淡，算係驚喜。食到一半有少少口渴，於是叫左杯紫貝天葵飲，味道唔錯。無論價錢服務同食物質素都唔錯，不過地點比較遠觀塘中心區，而且主打小菜，我呢類叫客飯既人未能試晒所有野，希望下次再黎可以叫多幾個餸。