皇玥

Open Now

Now Closed

今天響黃埔行街，途經皇玥，係新開嘅，見有各式酥餅糕點，入去睇吓有咩零食買。同其他分店一樣，呢度裝修都好靚。之前買過皇玥出品嘅奶黃月餅送禮，朋友讚口不絕。金玥囍餅禮盒 （$138）本身打算買蝴蝶酥，然後被櫥窗入邊顏色鮮艷，造型可愛嘅唐果子吸引。呢個禮合有兩款口味嘅蝴蝶酥（原味及伯爵茶味），同兩款口味嘅唐果子（豆沙及柚子味），一次可以試晒4款，啱晒貪心嘅我。唐果子係唐代的宮廷傳統特色糕點。經過改良嘅唐果子，用上了牛油、雞蛋、麵粉、蓮子等不同食材。一口咬下去，口感鬆化，餡料滿滿，甜度適中，豆沙餡綿密，而柚子口味則果香清新。唐果子表面的裝飾花係曲奇，好精緻，睇得又食得。職員介紹每一件唐果子都是人手搓皮包餡，絕對係一件手工藝作品。呢度嘅蝴蝶酥係由米芝蓮師傅主理，採用法國天然牛油。聞落下牛油香味自然，咬下去口感酥香鬆脆，食落唔會好膩，會令人一個接一個咁食，原味同伯爵茶都好味，鍾意伯爵茶嘅朋友一定唔可以錯過呢款伯爵茶口味嘅蝴蝶酥。伯爵茶薄脆精裝禮盒 （$68）每一塊薄脆都金黃香脆，纖薄的厚度令口感更為輕盈脆口，每一口都散發著牛油香，加上伯爵茶嘅香氣，我個人好鍾意，呢款薄脆絕對係下午茶嘅首選。