Domon 札幌拉麵 (Closed)

作為荃灣居民，想食日本拉麵，呢度就係唯一選擇，唔係就食味千。都無所謂既，係就係貴左少少，但係好食就算啦，氣氛又好，成日都一班日本人係入面食飯。早兩日去左，真係想問班夥計係唔係轉左手，差左咁多既﹖拉麵，唔彈牙，都算，竟然係未煮散既﹗重有一舊仔係團埋一齊，就算係任何一間港式拉麵店都唔會啦。個湯，唔鹹唔清，我都忍你，竟然唔熱既﹗暖暖地就上檯，係唔係玩呀﹖塊叉燒，唔肥唔香唔入味，OK，Fine﹗但是唔可能係凍架嘛...望下廚房，以前位肥師傅已經無左影，換左兩個仔係度；再望下其他野，愈來愈多野唔同，可樂唔係用支裝，變左罐裝；熱飲唔係以前既杯，變左澳門茶餐廳既鐵杯；檯上既紙巾唔再係日本牌子，而係不知名雜麥牌子；連裝調味料既，都變左樣。可能我奄尖啦，呢幾樣其實同味道無關，不過咁，對於一間標榜正宗既拉麵鋪，收人成七八十元一碗拉麵，有好多野係唔止味道咁簡單囉。唔會再去啦。