博多一幸舍 (Closed)

之前睇到OpenRice開飯情報見到新開拉麵店, 好似幾好食咁試下先!同一般拉麵店一樣都係係門口等位個時就有張落單紙俾你填。問左店員話一開始可以試下個定番, 濃厚豚骨拉麵或者清新豚骨拉麵, 睇想食濃口味定清淡d。最後要左清新豚骨拉麵加左糖心蛋同博多炸雞塊!黎到個湯底奶白色, 聞到淡淡既豬骨湯香味, 但試了一口湯覺得有點清淡!原來係要自己落拉麵醬油, 店員好熱情介紹日本空運過黎, 加左之後又真係釣番個味出黎, 比之前多左種鮮味, 味覺豐富左!我仲加左蒜蓉, 個湯底會惹味左, 不過小心加得太多會遮左豬骨味!枱上面有一般調味料, 加之前可以睇下牆上面既簡介, 如果落得重手左, 可以向店員免費要番個淡湯底, 都幾細心!個糖心蛋做得唔錯, 中間個蛋黃醬一咬就流出黎, 配上煮得嫩滑既蛋白, 一流!最後個博多炸雞塊, 外皮炸得非常香脆, 肉嫩滑, 裡面夾住一層薄薄既脂肪, 食落有少少雞油香, 但唔會太油膩, 推介!