咖啡韓食 (Closed)

今日同同事去咗呢間韓國菜食飯，見到價錢都唔會太貴～ 又好耐冇食韓國嘢，望咗陣就入咗去！呢排啱啱開學，有勁多學生，成間餐廳都幾乎滿晒咁滯😂每日都有特價套餐，星期一至星期五日日唔同，今日係炸醬麵、牛肉飯同埋牛肉湯飯，心大心細嘅我最後揀咗牛肉飯，配埋套餐都係$50左右～ 都算抵食，加咗套餐會有埋泡菜、芽菜同埋湯，都係幾蚊嘅分別，所以都值得加嘅！牛肉飯份量好多，啲牛肉略嫌有啲乾身，不過個汁唔錯嘅，而且真係好多，差唔多食唔晒😂碗飯又係勁大碗，實在係抵食之選！