馬辣台式鴛鴦火鍋 (大鴻輝(荃灣)中心) (Closed)

話說今日集中火力去shopping，晏畫嗰餐都只係食咗個tea，真係唔多夠，所以，夜晚嗰餐就要放肆啲，去食火鍋放題，十日內第二次喇，好擔心體重會繼續食添。朋友話，凡事要兩面看，食飽啲先有力減肥嘛……六點鐘上到嚟，經驗話俾我知呢個時間係最好，太早嚟食唔落，再晏少少嚟的話，有排排隊搭升降機，即使上到嚟都要等位。剔咗個蔬菜清湯 + 胡椒豬肚鴛鴦鍋，精選肉類和海鮮類都每樣剔了一份，然後，就周圍巡下，混下醬，拎嘢飲、拎其他火鍋配料。Hoegaarden、藍妹都係任飲。係專登揀蔬菜清湯的，貪佢清啲，淥起嘢食嚟，唔會搶走啲嘢食本身嘅味道。至於胡椒豬肚湯就係貪佢夠特別，唔係間間火鍋店都有。好快，個鍋就滾起，行動正式開始! Action!各類牛肉質素都唔錯，豬肉和羊肉就一般般。其他配料首選係蛋餃、魚腐，同埋鯇魚，食咗兩轉。烚下食下，個半鐘後，就有人叫你埋咗張單先，提醒你仲有半個鐘就夠鐘。其實，我哋一早都打卡收咗工，食到飽飽了。