大尾篤麥師傅 (Closed)

疫情咁耐都無去過燒野食了，今日心癢癢再訪麥師傅，去到見到價錢同以往差唔多，但就多左一款燒烤爐，唔洗用叉，係有網同埋用夾去燒，我地兩口子就試新野，同樣有兩包炭。基本餐具，蜜糖，紙巾，面包，開左爐就去拎野食，首先會有一盤咩都有既野食，之後可以自己再出去拎，每人包兩張8蚊飲品，超過就補錢，水同罐裝汽水都係唔洗補，枝裝同啤酒就補5-8蚊。一開始個爐都幾猛，好易燶，要快快手咁反，燒旺左之後就慢慢控制到，愈燒愈靚。最鍾意佢個豬扒，啖啖肉，呢度食物選擇不過不失，有豬扒，牛扒，魷魚，叉燒，牛柳粒，雞扒，金沙骨，腸仔，燒賣，魚蛋，墨魚丸，芝士魚餅，多春魚，芝士腸，紅腸，台灣腸等等，粟米，翠玉瓜，雞翼都有3-4隻口味，我地兩個人每次拎少少，食完再拎。唔經唔覺燒左三個鍾都已經好飽，佢任食5小時的，但我地都飽了就走，好滿足。雖然話5小時，但都無見過佢趕人走的，除左燒野食都有不同娛樂，有人打麻雀，小朋友有啲攤位同夾公仔機，旁邊都有俾小朋友跑跑跳跳既地方，一家大細去玩都唔錯。