御前上茶 (Closed)

天氣好熱，好想食雪糕，咁啱見到就試下。雙色係指綠茶及焙茶雪糕，先試綠色，係綠茶味雪糕，綠茶味唔算太濃，可能係雪糕少咗d苦味，感覺有d好幼細嘅冰係雪糕度，有d似沙冰，但就比沙冰滑好多，跟住再試啡啡地色嘅雪糕，係焙茶味，有少少烘焙嘅燶味，茶味濃d，我中意焙茶嘅味多d，至於紅豆都有起沙，但唔夠甜同香。蕨餅第一次食，綠茶當然係綠茶粉，黃色嘅係黃豆粉，個兩杯就係綠茶醬及焙茶醬嚟。綠茶粉蕨餅一入口綠茶粉慢慢溶，好濃嘅綠茶味，但對我嚟講有點太苦，食到蕨餅感覺有d似凉粉嘅質感，但有d似糯米滋皮嘅滑，好特別，甜甜地，幾好味。但我個人偏愛黃豆粉味，黃豆粉都係甜甜地，有d豆香，同蕨餅一齊食幾夾，但又唔會太甜。