美味餃子店 (Closed)

提起長沙灣嘅餃子黃店，首推當然係甜記餃子，原來附近仲有間叫美味餃子店，舊式小店格局，同甜記係兩種截然不同嘅風格。天氣太熱，唔想食湯餃，於是叫咗十隻煎韭菜肉餃（我成日覺得，煎餃一定係韭菜最好食，湯餃嘅話，就一定要叫白菜或者椰菜）。一上枱，嚇咗一跳：煎餃比想像中燶，食落口，餃皮頗硬，有少少失望😐，不過入面嘅餡料就味道唔錯。食食下，見同枱其他食客不斷添加小店自家製嘅菜脯辣椒油，轉眼間，成樽嘢只剩返三兩羹，我都唔執輸，即刻𢳂咗少少試下，果然非常惹味，用嚟點煎餃食，味道一流👍。後來聽朋友講，呢間嘅湯餃好好食，好，一於要再嚟試多次。