龍門冰室 (Closed)

夜晚媽咪無煮飯, 於是就同屋企人去左龍門冰室食飯!之前我地都食過, 覺得唔錯, 所以就再回頭食多次。佢呢度既價錢相宜, 而且份量都幾大碟, 一份都可以食得好飽。我D屋企人個個都叫個扒餐, 好食又抵食, 而我之前都成日食, 今次就試下其他野, 就叫左個波洛尼肉醬意粉配德國紐倫堡腸, 呢個餐仲有沙律、餐湯同飲品送。首先黎既就係我的最愛-熱杏霜, 可以滋補養顏, 杏仁味都幾濃郁, 飲完都有一陣杏仁味留係口腔入面, 都好令人回味!沙律都幾豐富, 有粟米、雞蛋同菠蘿, 好有口感。酸酸甜甜都幾開胃!小食點左蜜糖雞翼同黑松露芝士焗雜菌西蘭花。 蜜糖雞翼有炸過, 再淋上蜜糖, 食落好香脆, 仲有陣陣蜜糖味, 幾好食! 雞翼旁邊都有少少沙律菜, 可以中和油膩感。黑松露芝士焗雜菌西蘭花有好濃黑松露味, 西蘭花上放有好多芝士, 去除左西蘭花原有既菜青味。最後到主菜-波洛尼肉醬意粉配德國紐倫堡腸, 肉醬意粉已經幫你預先撈起, 每一條意粉都占滿肉醬, 德國紐倫堡腸好香香草味, 肉腸好彈牙!試新野都唔會中伏, 仲要幾好食, 邊可以唔再一次幫襯呢~