Terrace in seaside (海運大廈)

Open Now

Now Closed

好耐冇約朋友見面，趁住疫情放緩，週末約咗朋友出嚟食餐飯，揀咗海運嘅呢間人氣韓國菜，每次行過都有長長嘅人龍。今日時間尚早，大概等咗幾個字就可以入座。點菜後店員為我哋送上泡菜，份量唔多但非常開胃。柑橘炸雞半份嘅份量亦唔少，配搭韓式年糕同炸薯條，我哋揀咗無骨炸雞，食起上嚟更方便。炸雞非常香脆，咬落仲帶有肉汁，透住好清香嘅柑橘味，食多幾舊都唔怕膩。紫菜飯卷超級吸引，即叫即卷，飯嘅口感煙韌得嚟唔會太硬，簡單嘅食材都可以令人有滿滿嘅幸福感！蛋包飯外表平平無奇，上菜之後店員會喺蛋嘅表面輕輕𠝹一刀，湧現眼前嘅係鮮嫩嘅滑蛋，配上鮮美嘅明太子醬，一流！Tiramisu原盒上，感覺乾淨衛生，口感濕潤軟綿，甜度適中，係幸福嘅感覺。終於嚟到一直想食嘅忌廉水果三文治，賣相精緻誘人，水果新鮮不在話下，麵包嘅口感非常軟綿，同鮮忌廉一齊食毫無違和感，難怪一直係鎮店名物！柑橘味道清新，配搭乳酪一齊飲，竟然出奇地合襯，與其話係飲品，話佢係甜品亦不為過。菠蘿沙冰味道同樣清爽，甜度適中，鮮甜解渴。餐廳嘅食物賣相精美，好適合打卡，味道亦非常唔錯，難怪能夠成為熱店！