福和雍

Open Now

Now Closed

中環最近新開一間主打手工精緻點心嘅茶館「福和雍」，屋企人見未試過，雜誌影出嚟嘅相都唔錯，於是我哋又去試吓。叫得做茶館，提供嘅茶葉都有好多選擇，餐牌上對每種茶葉都有詳細嘅介紹。茶錢由$40-$120 一位（小童都會計架）。我哋一行四人，就開咗四壺分別$40嘅茶嚟試試。我唔係好識品嚐中國茶，不過覺得「鳳凰單叢」呢款烏龍茶最啱我口味。因為聞落有花香味，飲後亦有回甘，而且仲有减肥美容同抗衰老功效！點心方面，由前福臨門老師傅主理，即叫即做，都頗有水準。我哋叫咗：蝦餃、燒賣、芋角、迷你雞批同埋韭菜炸蟹盒。值得推介嘅係韭菜炸蟹盒，外皮脆卜卜，唔油膩，韭菜同蟹肉嘅比例啱啱好，同時食到蟹肉嘅鮮味同埋韭菜嘅青草味。「福和雍」另一特色係瓷器。餐廳用咗有近百年歷史嘅香港老品牌，粵東磁廠嘅出品。瓷器係白色底，繪上藍色嘅花紋及圖案，優雅別緻。餐廳各方面都唔錯，只不過個地點就有啲奇怪。佢喺娛樂行嘅2樓，走廊開闢出嚟嘅一個地方，個格局同價錢唔成正比。如果餐廳冇咁開陽，冇咁嘈，用餐嘅時候會舒服得多。