潮福蒸氣石鍋 (Closed)

朋友敍舊，全部男人，最驚唔飽，又想食豪d又驚貴，最好呢度任飲任食，又無時段限制，咁先暢快。有蔗水，韓底罐裝，碑酒仲有 asahi。海鮮係指定，肥牛同其他料任食。一嚟就上指定每人燒乳鴿同燉湯，頂頂肚，燒得唔錯，幾香，入味。呢度蒸火鍋唔同出面咁自己計時，自己上，一嚮鐘就有人飛埋嚟招呼，唔使叔親自動手! 蜆最易熟，果然識做，係指定海鮮既第一味。估唔到蜆同花甲都幾大隻，仲有東風螺。啖啖肉，無沙，每人都最少分到8，9隻，蒸完出嚟，蜆味海水味比平時濃幾倍，正!蒸元貝，大過乒乓波，加埋蒜蓉，蒸得剛剛好。桶蠔都肥美，北寄貝，熟左放喺壽司就食得多，新鮮蒸，仲要加粉絲蒜頭都係第一次，好食，爽口。龍蝦開邊，一人半隻，都係新鮮，白肉爽甜。蒸龍躉肉，好滑，魚皮膠質重，好快掃清。和牛片，1分鐘就得，重牛味，加左幾輪單，每次質素都ok。金針蒸雞，滑蝦丸牛肉球都彈牙，仲有釀冬菇，釀豆卜馬拉糕，食之前無咩期望，都係酒樓馬拉糕，估唔到好鬆軟，又唔太甜，又係翻單之選。最後食個粥先係主角，所有海鮮精華喺晒度，個個話飽話飽都食兩碗。