川味美食

Open Now

Now Closed

食過好多賣薯粉嘅食店，啲薯粉都有一個弊病就係太稔，薯粉本身質素差。但川味就絕對唔會令你失望，因為川味美食可能係CP最高嘅薯粉麵食店！川味嘅薯粉有粗，有幼。粗薯粉最適合做涼拌/撈薯粉。撈薯粉冇湯而係用特製調味醬料，配料有炸醬，芽菜，花生，粗薯粉吸盡醬料味道，夏天食就最啱喇！幼薯粉有獨特嘅紐紋，用筷子夾起嚟唔容易滑落，配湯就最啱！湯底鮮甜有幾個唔同辣度，但其實差別唔大。麻辣湯底唔麻唔辣，真心唔推介。如果鍾意食辣想加辣，倒不如加枱上面嘅海南黃辣椒醬，比紅辣椒醬更辣，坊間食店少有！餸菜同車仔麵差唔多，款款都幾好，冇乜驚喜但又冇乜伏味！下午茶時段嚟食，會送飲品最抵！除咗薯粉外，佢嘅拉麵都幾好，撈拉麵比薯粉多，平日見好多學生哥嚟食。米線/河粉就太稔唔推介。最後要講吓服務，雖然我同店員阿姐唔熟，但我都想為佢平反一下！店員阿姐只係比較COOL 並唔係態度差，用心發現佢其實好細心。街坊生意，自在最重要！我想講嘅係，我每次嚟幫襯都好自在，重來冇受過氣。