Gathering (Closed)

今晚放工直入元朗食Gathering...一路都有元朗朋友介紹呢一間西餐廳，價錢唔貴，入開去係可以值得去試！位置唔算太近西鐵站，但用google map search, 都好易搵到！打開餐牌睇，價錢的確抵食！可以升級做套餐，加$28就有是日餐湯或沙律加飲品！我地就叫咗個四重芝士薄餅，同黑松露野菌意大利飯升級做套餐，然後點左一個野菌炒雜菇，啤酒脆醬炸日本廣島蠔，同埋意式炸飯波！四重芝士薄餅，勁濃芝士味，而且佢有一種芝士係羊奶，點餐時店員會問怕唔怕羶味，我就當然唔怕，而朋友食落其實係接受到嘅，大家都可以試下！至於個黑松露飯當然要大力推薦，好重黑松露味，而且好creamy, 份量亦唔少！另外啲小食都唔錯，野菌炒雜菇好香牛油味，日本炸蠔亦好大隻肥美，炸完唔會好乾身，入面都好juicy！意式炸飯波初時唔知係乜，叫嚟試下，原來係外面應該係麵包糠炸到好脆，入面包住啲意大利飯，口感幾得意，而且入面啲飯仲好濕，唔錯！食咗咁多嘢，飲品仲升級咗都係每人二百幾蚊度，而且真係超乎預期咁好味！