孖女廚房泰好味

Open Now

Now Closed

朋友推介，長沙灣開左間正宗地道泰國菜，無論由廚房到門面，都由泰國人一手經營同包辦，長沙灣同深水埗居民，又多一個新選擇。餐廳唔算大，裝修骨子，充滿泰國風情味道。menu嘢食都幾多，價錢亦親民，我同朋友叫左小食、炒菜、主菜同特色菜式。泰式炸蝦餅：賣相幾好，剛炸起，熱辣辣。蝦餅食落香脆彈牙，點埋泰式甜辣就更好食。馬拉盞炒通菜：通菜炒得夠翠綠，有鑊氣，馬拉盞鹹鹹香香，整體味道辣辣地，又幾惹味。鐵板蠔仔炒蛋：份量多，炒蛋夠香，蠔仔新鮮，size唔細，入口軟軟肥美，好有蠔味，旁邊辣醬辣度都ok喎，配埋一齊食，唔錯。底鋪左芽菜，好爽口。鐵板用火keep住熱，唔會話一陣間就凍晒，呢D凍天氣食佢就最啱。泰式炒粉絲 (牛肉)：賣相吸引，除左牛肉，配菜有紅椒、青椒、洋蔥、椰菜、芽菜、雞肶菇同雞蛋，非常豐富，上面仲灑左花生碎。整體炒得幾香，夠味，炒粉絲唔會話炒到一舊舊，亦唔算多油，同樣夠鑊氣，配菜又夠爽口，少辣，幾好味。青檸梳打：青檸帶酸味，梳打甜味中和返，幾清爽。椰汁冰：椰汁味重，加左花奶味道較香，唔算話太多冰，好飲。