百年路 (Closed)

印象中，觀塘嘅星馬餐廳唔多，以前最鍾意去碼頭間拿督，直到今時今日，我始終認為佢哋嘅喇沙係全港最好食，不過已經好幾年冇去過啦。早前，無意中有幸搵到百年路呢間有質素嘅星馬餐廳😀。去到門口，一睇餐牌，喇沙呀蝦湯麵呀巴東牛肉呀啦啦粉呀等等等等，好多嘢都好想食🤤，最後落單一刻就決定試下店員推介嘅老街肉骨茶。以五十零蚊嚟講，呢個肉骨茶性價比絕對高，餸多湯多，配送嘅油條同白飯都大大份。呢度嘅湯底味道較濃，藥材味同豬肉嘅鮮味同樣豐富，用嚟撈飯食一流。我最鍾意食豆卜，因為蘸滿湯底，入口即爆湯，好正😍；另外，肉排肥瘦均勻，唔會好似一般煲湯瘦肉咁鞋颯颯，點辣豉油食，好味👍；其餘配料仲有生菜，金菇同冬菇，食哂成煲，清埋白飯同油條，飽到上心口😂，再飲杯我至愛嘅青桔酸梅水，呢餐勁滿足🤗。