佳記甜品 (Moved) New Location

元朗B仔涼粉咁出名，行過元朗一定要試下。今次就嚟咗佳記甜品嘅新鋪。一入到舖頭，自己搵咗個位坐低，地方唔算乾淨，見到有啲食物殘渣喺地下。只係下晝4點幾，佳記甜品就已經坐滿人咁滯，門庭若市，睇嚟今次應該無嚟錯。菠蘿涼粉：好足料！！菠蘿裝到滿瀉咁滯，菠蘿好甜，唔酸，係呢一個菠蘿唔當造嘅季節，仍然可以食到咁嘅品質嘅水果係相當難得。附送嘅一碗花奶令到涼粉變得更滑，基本上唔洗點咬就可以吞落喉嚨。值得一讚嘅係涼粉唔會話落咗好多糖水，甜度適中。總括嚟講，呢碗涼粉係符合水準。芒果西米露：我朋友叫嘅，食咗一啖，椰汁味香濃，西米露粒粒分明，唔錯唔錯。蒜蓉香辣雞翼尖：聽朋友話呢度嘅雞翼尖好出名先至叫嘅。$16蚊咁大碟都算抵食。但係呢碟嘢嘅味道真係唔多掂。「蒜蓉」，雖然見到有好多蒜蓉，但係食唔出有蒜蓉味，所有蒜蓉味都比辣味掩蓋晒。「香辣」，一定夠晒辣，但係淨係食到辣味，冇乜底味好似咸味咁樣。雞翼尖煲得太腍，令到雞翼尖肉質偏霉，而雞皮亦唔嫩滑。總括而言，呢碟雞翼尖絕對係低於正常水準，得個辣字。