榕易燒泰式串燒專門店 (Closed)

望穿秋水，終於等到晚市重光😂，值得紀念嘅第一餐，梗係要食最鍾意嘅嘢，我就揀咗食串燒。呢間店全部都係露天座位，感覺好 chill，有啲似去咗 BBQ 場燒嘢食。眾多燒烤食物當中，我最鍾意燒原條蒜蓉茄子，茄子算肥美，調味都幾重手，蒜蓉味勁濃，好好食😍，不過食完個口好臭，戴返口罩時就自己受哂🤣。另外燒豆卜都好正，又香又脆；日式一口牛都唔錯，肉質有肥有瘦有咬口，亦有牛味；其餘蜜糖雞中翼，雞皮串，兩款台灣腸等等就正常水準，至於燒羊架唔係我食，無可奉告😁。最弱係燒粟米，唔單止唔甜，仲好硬，唔好食😖。由於係泰式串燒，店員會奉上點豬頸肉嘅醬汁，酸酸辣辣，好惹味😋。除咗燒烤食物，呢度仲有好多泰式食品提供，我哋叫咗椒鹽魷魚鬚同泰式炒椰菜苗，魷魚鬚外層香脆惹味，入面肉質軟腍，有魷魚鮮味，餸酒一流（事實上，成個場大部份食客都係啤酒接啤酒咁隊，得我哋咁正氣飲烏龍茶桔仔冰😆），椰菜苗比較少機會食，一個個圓碌碌好得意，炒得亦好香，不過質感偏硬，唔係我鍾意嘅口味。本來仲叫咗蠔餅，不過漏咗單，唔緊要，因為食到呢度都已經飽哂，埋單時，發現原來唔使加一，所以算幾抵食，會再嚟幫襯。