紅車厘麵包西餅

Open Now

Now Closed

晌深水埗明星海鮮酒家跟屋企人食完團年飯，向地鐵方向行，路經紅車厘，門口餅櫃之上堆滿炸油角、牛耳，老婆話買兩包返去應吓節，被我睇穿佢啦，都喺口痕想食啫。一晌都無乜人嚟小弟屋企拜年嘅，通常喺我哋去親戚度，結果，買番嚟最後都喺我哋兩公婆食鬼晒，哈哈。炸油角（角仔）$26雖然佢無寫，小弟亦無問，不過拎起嚟幾墜手，大概半磅左右。傳統做法，都喺芝麻、花生、椰絲、砂糖做餡，餡料研磨細碎，味道濃香，而外層炸得酥脆，比起零食物語啲豬肉鬆角仔，都喺傳統嘢有韻味啲。有個感覺，晌依啲麵包鋪頭仔買角仔，會新鮮啲，因為鋪後就喺工場，睇住銷售情況嚟睇住做。其實整角仔喺小弟同姑媽、表哥表姊們嘅集體回憶嚟，廿幾年前，仲住晌啲7層H形公屋，通常都喺自家製再派街坊，搓皮就未輪到我，不過包餡、收口、摺邊我都OK架，工多藝熟吖嘛，以前年年都喺咁整。依家？應該生晒銹啦！牛耳 $20另一懷舊小食，平時都真喺好少買，鬼叫依家咁多零食選擇咩！紅車厘嘅牛耳做得非常薄，所以咬落極香脆，又帶點點南乳香。食得薯片多，轉食吓牛耳都唔錯，廿蚊一大包，買筒薯片都差唔多啦，份量仲邊有咁多添，可以嘅話不妨支持吓依種傳統小食，又支持吓啲舊區小店。