華嫂冰室 (Closed)

去親觀塘都會好想食華嫂冰室，無奈成日時間都夾唔啱，因為佢好早就閂門。今日咁岩下午要去觀塘做嘢，終於可以食到期待已久嘅招牌菠蘿包啦！呢個招牌菠蘿包真係無得輸，出到嚟熱辣辣，已經佈滿住菠蘿包嘅香味。菠蘿包入面有蕃茄、雞蛋同埋一片超厚牛油，真係超級超級邪惡。我鍾意個菠蘿包外面層皮會好脆，裡面嘅材料味道又好夾，嗰塊牛油仲要係重點，咬入去牛油香味濃郁，令到整體都好滑溜，咬完一啖又想再啖多啖，完全停唔到口呀。呢度嘅凍奶茶都好好飲，茶味香濃之餘，奶香亦夠，perfect!