金記冰室 (黃大仙中心南館) (Under Renovation)

日期：10月6日人數：2人來到重陽時節，當然要去登高啦。呢日就約咗個朋友行獅子山，出發之前就喺黃大仙食咗個早餐。由滿目瘡痍嘅地鐵站出口行出嚟，就會見到呢間金記冰室。由於我哋覺得佢好似幾有特色，所以就入咗去試下。我哋兩個人都係叫咗豬潤公仔麵，火腿奄列，加一塊多士嘅早餐。我就飲凍檸茶，朋友就例牌飲凍鴛鴦。豬膶公仔麵都幾有心思，首先湯底有少許麻油味，煮得腍度啱啱好，麵底都算唔錯，起碼唔會吸晒啲湯，或者好快就腍晒。豬膶份量好少，但都有放薑絲，唔算hea。麵上邊仲有幾粒杞子，感覺高檔左少少，但其實無乜實際。火腿奄列同樣份量都唔大，味道中規中矩，落少少鹽吊起味道都可以接受。多士方面，麵包幾新鮮。加上應該係即刻烘，所以都好熱。配埋牛油味道算唔錯。凍檸茶正常水準，唔夠大杯。環境方面，裝修係冰室風格，座位亦都夠大，乾淨衛生。餐廳地理位置方便。價錢方面，因為我叫咗凍飲要+$3，所以最後早餐埋單$45。個人覺得味道可以接受，但就唔太抵食。