Cow Bean (康怡廣場) (Closed)

母親節因為係假期，外出食嘢人多擠迫唔在講，又貴又招呼唔好，過哂節先去食，咁就食得舒舒服服。今日午餐就同老婆大人兩支公去咗康怡廣場Aeon 百貨三樓果間Cow Bean 鋸排補祝母親節！呢度地方好濶落，大部份係高背卡座，坐得好舒服！由於過咗中午繁忙時段，安排入座都好易，店員好有禮介紹佢地精選牛扒套餐同食材製作！好譲我地了解一下！我點咗個澳洲M7和牛肉眼扒，加配薯條，野菜沙律，再加一杯啤酒！老婆就要咗一份紐西蘭肉眼扒，配黑椒汁！兩份牛扒都係200克份量，都幾厚身，本身上桌已經有四五成熟，然後就搽D牛油在牛扒身上再直接放在燒熱鉄板上再炙熟，成熟程度就可以自己控制啦！澳洲M7和牛，油脂分佈均勻，香腍軟滑，而且冇渣，仲好有牛味！配菜沙律同炸薯條都好襯嘅配搭，呷啖冰凍啤酒，正到不得了！老婆果份紐西蘭肉眼扒又係肉質幼嫩，，鋸開小塊，醮D黑椒汁慢慢品嚐，滋味十足！埋單$400，以性價比，真係好食又超值！