緣聚鮮鍋 (Closed)

今日去機舖打咗全日機，成身又攰又肚餓，於是就搵返間放題食到回本為止，見到呢間餐廳幾多花款又適合我地，就直接上去食返餐，做好安心出行同埋量體溫就安排入座！多花款嘅意思就係餐廳可以比食客先選擇食雞煲後加湯然後打邊爐，又或者揀一個特色湯底直接打邊爐，佢總共都有成九款湯底比食客選擇，比較有特色嘅就有芫荽湯底、蕃茄湯底又或者麻辣鴨血湯底等等，但由於我哋都係鍾情於雞煲，所以唯有放棄以上嘅湯底。雞煲一上枱就聞到好濃嘅香味，雞件量多，肉質都較為嫩口，而佢哋嘅雞煲較少雞汁，令雞肉變得更加入味，因為較為乾身嘅關係，建議食雞煲嘅時候熄火以免癡底！除咗雞件外，仲有好多其他嘅配菜，而最令我印象深刻嘅就係翠玉瓜，瓜肉鮮甜爽口而且吸盡雞汁嘅精華，相當美味！再嚟就係加湯打邊爐，佢哋嘅火鍋配料都相當之多，肥牛丸類海鮮蔬菜麵等等應有盡有，食材嘅取材新鮮而且種類繁多，一定滿足到唔同口味嘅人士！仲有仲有就係出面嘅吧枱，有好多其他嘅餐前小食、壽司、甜品同埋嘢飲等等，當中刺身較為推介劍魚，劍魚雖然帶少少腥味但食落口相當之肥美，比起三文魚更加突出！甜品就較為推介桂花糕同埋芒果布甸，甜品嘅甜度普遍適中而且份量唔大，等大家可以試多幾款