焱燒串燒專門店 (Closed)

佐敦呢個位不嬲都好多好嘢食，今日經過見到有間傳銷店裝修得好靚，而且喺門口見到佢嘅價錢都好平，咁就一於入去試吓啦。入面有好多唔同嘅霓虹燈，好適合打卡，而且佢嘅位置都好闊落，冷氣亦都好夠，啱晒一大班朋友嚟食。首先我哋就叫咗呢個甜辣雞翼，我覺得好值得一試，因為佢嘅味道好特別，甜甜地辣辣地好開胃。另外，佢嘅蒜蓉燒金菇同埋蒜蓉娃娃菜都好好食，材料一啲都唔會慳，食落好惹味，而且燒嘅時間啱啱好。我哋仲叫咗一大堆串燒，我覺得佢嘅燒雞皮同埋牛仔骨最值得一試。因為牛仔骨既價錢好平，但係竟然份量好大，而且佢嘅牛食落都係非常高質嘅，唔會太冧又唔會太硬。而佢嘅燒雞皮燒到夠哂乾，食落一啲都唔肥膩，非常脆同香。另外我哋仲叫咗一個比較貴嘅蒜苗燒扇貝，不過價錢其實好抵。因為佢嘅扇貝好大粒出去買都應該要幾十蚊一舊，所以真係非常抵食。而且佢食落好新鮮，鮮味好夠！間餐廳又平又好食，真係好啱一大班朋友過嚟飲下啤酒食下串燒呀。