文記車仔麵 (福榮街)

Open Now

Now Closed

嚟到深水埗覓食，當然唔少得文記車仔麵啦！已經有一年多冇嚟食文記啦～ 係我個印象就係好多人排隊，同埋啲食材好豐富。文記喺同一條街有三間分店，見到其中一間冇咩人就即刻入咗去食啦。我今次叫咗幼麵，配牛腩、麵筋、瑞士雞翼同蘿蔔，配埋招牌辣汁。-首先，真係要讚下佢哋嘅牛腩炆得好琳，啲肉係入口即溶嗰隻，份量都幾多，啱晒我口味。試埋佢哋嘅瑞士雞翼更加係一試難忘，同樣炆得好入味，裏面嘅肉仲幾嫩滑添。蘿蔔都真係有幾多舊，炆得超級琳，入口即化，味道仲好鮮甜。全部配料都好出色，配埋招牌辣汁就更加惹味。但提一提怕辣嘅朋友可能真係要小辣啦，事關佢哋嘅辣汁都真係幾辣㗎～