早安越南 (Closed)

記起對上一次真係食越南野已經係上年十月係深井食了。啱啱好睇完金剛就越南風情畫上身，直接係隔離解下癮。入到去其實覺得佢似間西餐廳多啲，霓虹燈管同牆壁上嘅酒瓶組合起黎似西式風格。但枱面一樣有辣椒醬同食撈麵用嘅酸辣汁，好一個Mix&Match。第一主食揀左生牛肉湯河，牛肉湯好夠味，唔係死咸死咸的，加上又夠熱，令切得薄嘅牛肉浸係熱湯中好快熟。而且牛肉浸耐左都無過老，仲保持到嫩口。唔錯唔錯。只係河粉少左啲作為晚餐未夠飽。而第二主食係馬拉盞海鮮炒飯。個炒飯非常足料，配料雖然同其他餐廳嘅差不多，青口魷魚蝦等，但入面用左三大隻開邊鮮蝦，而且啲飯炒得夠乾身，所以食落唔油口。我地為左過下口癮，所以點左炸蝦餅。本來無咩特別，但咬落去先發覺好結實外皮炸得好香口，蝦味又足，以為平平無奇嘅一口出奇地好食。尤其係點埋個酸辣醬，中和油分之餘亦蝦餅食落無咁單調。睇完越南戲，食埋越南飯，做左一晚越南人，哈哈。