添記法式三文治

Open Now

Now Closed

之前提過影帝張家輝喺一套電影裡面提過能夠專心做好一件事就會成功， 添記就以用心製作嘅越南法式三文治賣到街知巷聞。 小店坐落於佐敦渡船角一條小街上，雖然位置偏僻但每次都見客人光顧不斷，除本地客外近年自由行嘅旅客都唔少。 其實店只賣獨孤一味三文治無任何選擇，客人只可選大或小size，點解仲吸引咁多客人幫趁呢？ 原因就係店主製造認真同一直保持水準。店只有二人或有時一人，接order後就將各樣肉類包括扎肉、嚼肉和豬蹄肉(我肉眼睇到3款肉唔知仲有無其他)放入法包裡面，喺包表面噴水後就放入焗爐烘焗幾分鐘，出爐後加入醃製過帶少少酸味紅蘿蔔絲， 法包面鬆脆無比，我已好小心食但咬一口就成手成身都係麵包碎，可想而知有幾脆啦。 夾咗肉至烘能夠令肉從室溫加熱，出爐時微暖唔會過熱。 材料配搭出色食落有層次，味道調較得恰到好處，喜歡辣的話可要求加鮮辣椒。 雖然排長龍，但店主並無粗製濫做預先整定，而係接一個order做一份確保新鮮。 多謝店主對出品嘅堅持同對客人嘅尊重讓客人每次都可以品嚐美食法式三文治。