娘娘喫茶 (Closed)

呢個週末只可以係屋企附近行街，就探索下呢度新開左啲咩舖頭。原來開左間茶飲店叫娘娘喫茶。今日黎到仲比我見到老闆娘娘真身哈哈。呢度開業只有一個月，所以做緊新張優惠就係Like Facebook可以每杯減$3。咁抵就要支持下喇。<娘娘招牌水果茶>（$38）呢個點解係招牌，就係集齊多款新鮮水果，包括百香果、西瓜、橙、青檸，我揀左無糖，因為就係想感受來自水果既自然甜。幾滿意，酸酸甜甜，飲完仲可以食埋啲水果。<Oreo芝士奶茶>（$35）呢個係邪惡既一款啊，厚厚既芝士上面仲有Oreo！下面仲要係奶滑既奶茶，不得了！揀左少甜，對我黎講就啱啱好，茶味比較出，我最鍾意！上面Oreo 夠曬脆，全部撈起口味夠特別！<芝士四季春>（$28）四季春永遠係不敗，我仲叫埋走冰，唔怕冰水整啖，茶味夠曬濃。個芝士奶蓋目測2cm，比足貨架。飲落芝士味夠重啊，第一啖如果要飲到芝士加茶，就要打開杯蓋大啖飲，如果唔係就會同厚厚既芝士差身而過。